鴨脷洲大橋橋底可以做咩？

香港仔大道／鴨脷洲大橋休憩處，近香港仔工業學
校，一直以來都冇乜人用。好多柱位，又暗又遮敝，
對行人亳無吸引力。就算俾間學校，佢哋話唔要。


鴨脷洲大橋（北端）兒童遊樂場，喺香港仔警署同
逸港居中間，設施好單調，所以無乜人用，但較多
人途經，係步行來往黃竹坑同香港仔嘅主要途徑。

本人諗過轉做以下用途
－－
香港仔大道／鴨脷洲大橋休憩處：遙控車場／市集／
兒童遊樂場？

鴨脷洲大橋（北端）兒童遊樂場：擺幾張乒乓波檯？

啲 idea 好似唔係幾得，希望大家可以俾啲意見，
感謝！

躍動港島南有提改動執靚佢

我想: 西行條路整直啲闊啲, 減少樓梯級進出休憩處, 巴士廠縮番入啲, 大橋西行橋底空間大番啲, 連到對面的行人天橋變成一個大平台, 有遊樂設施 座椅 花園 眺望處, 做類似尖東麼地道巴士總站頂層花園迷你版, 香港仔大道/大橋嗰邊可以連去景惠花園條行人天橋, 使市民可更易到達逸港居和巴士站, 帶多一點人氣, 至於大橋北端迴圈橋底, 實在太陰暗, 適宜放置食環/康文搞衛生的用品, 但不知能否增闢山徑從此處走上香港仔水塘, 成為郊遊路線起/終點. 無論用咩辦法改善暢達度和吸引度, 都想連同黃竹坑明渠畔一起考慮, 沿南港島線橋底開始美化, 加強行人舒適感, 甚至命名該行人徑可達鴨橋北端和逸港居, 市民才會更感興趣前往.