新加坡航空 香港<>新加坡 優選經濟艙體驗

*咁好彩中咗STAR ALLANEC塗裝，但呢個只係中伏嘅開端

日期：23MAY2019
時間：0800-1150 (0810-1140)
航班：SQ1 HKG>SIN
機型：Boeing 777-300ER 9V-SWM


平時實在坐得太多國泰航空，難得係去台灣以外嘅地方最好當然坐其他航空公司，今次經朋友商討後決定選擇比國泰稍平嘅新加坡航空，體驗一下呢間全球最佳航空公司，比起國泰嘅軟硬件又會好幾多呢？呢次應該係本年度最後一次坐星空聯盟嘅航班，19年內到20年頭繼續以環宇一家航班為主。

自上次坐完ANA之後，就有計劃以後飛行時間3hr以上嘅航機有PEY而且乎合預算範圍內都會考慮，本來今次可以唔使4千就坐到，可惜一拖再拖就搞到成$4401，點都好喺朋友嫌國泰貴而我又唔夠里數換機票嘅情況下呢口價叫合理同比國泰平

座位安排係2-4-2屬正常安排，闊度只係比經濟艙闊一吋咁多，但造型上同國泰一樣類似舊式商務艙座位，心理上就會覺得闊好多，亦比某啲PEY價嘅Economy plus好得多。座距約為38吋，終於唔使怕踢到前面嘅乘客，如果想要最頭一排嘅特闊空間就要畀多4百幾先有。


閲讀燈同USB Port係標準配置，充電速度肯定比國泰A359快，位置位於兩張凳中間算方便乘客，耳機插位都係呢個位但竟然係可以用到自己耳機，咁就唔使賭大細啦



置物空間唔算好多，機上雜誌加耳機成組放晒同一個位撐爆晒，純粹因為夠滿先全程無跌嘢，考慮到機齡成11年就無理由針對“全球最佳航空公司”少少問題都唔執好，同一個位置後方仲有空間放得落一個大耳機嘅盒同iPad再加DC仔


屏幕係13.3吋全高清屏幕，採用最新一代銀刃系統，有中文但唔會全部用中文顯示，內容可以話夠多但分類做得唔夠好，有啲電影要睇返本雜誌再用搜尋先搵到出嚟，呢度扣咗少少分


遙控器係輕觸式但唔可以當第二個屏幕，放返原位記得熄mon，否則你會不停觸碰到


飛安影片有手語，對聾啞人士友好呢點值得稱讚


多謝前座兩位男士將椅背挨到最後， 咁就可以體驗到有幾迫而且係全程，好在屏幕角度可以調較


今次預先訂咗特別餐“名廚有約”，早餐時段中式西式二選一，我揀咗西式“馬鈴薯餅搭配起司炒蛋和香煎雞肉香腸“，聽落應該唔會中伏，嗎？


好抱歉係我期望有啲高，馬鈴薯餅無味，炒蛋叫有少少味但芝士味唔係好食得出，但賣相係唔錯嘅會令你有食慾，牛角包係成個餐送上嚟時已經有，唔差但唔夠KA嘅鬆軟；上餐時有埋蘋果汁，你亦可以問空者攞多杯其他飲品，縱觀優選經濟艙派餐時段，你唔係特別餐就會上餐時問你飲乜，特別餐就你要主動叫，觀感上欠佳但我個人無扣呢方面嘅分


WiFi 由Panasonic提供但唔係任用，去程100MB呢口價叫還好，起碼大部份時間上到網先，回程先嘔血


日期：26MAY2019
時間：1830-2215 (1841-2211)
航班：SQ2 SIN>HKG
機型：Boeing 777-300ER 9V-SWZ


講回程航班前先講下樟宜機場


T3指示十分清晰，但要留意經濟艙check-in同drop-off喺第4區，其他嘅要行多幾步


JEWEL呢個新景點近T1多少少，T3行去都有一段路程，有意去打卡就要留意下預留足夠時間，同行友人差少少趕唔切返T3。

機管局成日想將客運大樓商場化尤其係T2本身就係咁定位，JEWEL 呢度先至叫做到呢個效果，食肆同零售商店數量足夠，好過香港無心無力。



禁區內休憩空間同設施好多，大人同細路都可以滿足到



睇完JEWEL室內瀑布，禁區內仲有真蝴蝶可以睇，真係估佢唔到


你以為出境前唔使安檢？上機前先做，預計登機時間為1730，10分鐘前先開放安檢，成個過程十分順暢，同行友人即使比較遲都唔係花咗好多時入去。


回程係一個特別日子，對自己好啲就畀錢坐加闊位，去程時就發現自己完全忘記咗SQ2都係77W，意味住坐exit row起飛同降落前無得用IFE之餘仲要坐正空中服務員對面，唔緊要反正可以閉目養神一下。



用得IFE嗰時我同鄰座乘客研究咗一陣點樣開出嚟，結果要大力少少先開到，收返時又係要大大力先得




起飛前有熱毛巾，起飛後會開始第一次提供飲品同小食，飲品有水、橙汁同酒精類飲品


送餐終於唔再係打曬扙，可能其中一個原因係今次上餐派杯裝水，唔同去程咁要斟果汁，空姐上餐時會同你講飲品會之後再上一次，到時就可以要求飲啲乜。


今次繼續係名廚有約，由於機艙氣氛燈影響睇唔清楚賣相，但呢次主菜味道上係乎合預期，甜品就反而伏咗。食完就開始派雪糕，終於唔係哈根大師而且每杯份量比哈根大師多，而且唔使等好耐就食得，呢下抵讚。


總結：畀$4401肉痛但叫值

作為長期CX嘅乘客今次坐新航唔算有驚喜，雖然去程表現感覺上遜於預期，但回程嘅體驗令我覺得好多方面都贏國泰但未算好大領先。同先前坐長榮唔同，今次評價係可以有下次，嚟緊再去新加坡一定係新航優選經濟艙做首選

下回預告：
國泰航空 紅眼航班 特選經濟艙體驗 2月

77W版本的PEY
個人覺得最前排的座位唯一的缺點，就是即使是窗口位但沒有窗戶，不太值得去加錢劃

SQ會在航班起飛前一星期會出電郵通知，告知乘客可以自行出價升級至PEY，價高者得




題外話

也坐過SQ PEY HKG/SIN/ZRH，350+380，也是Recaro產品，同感唔值。尤其係380機艙空間感大，坐低咗似係小矮人入咗大城堡咁。
而且座位視覺很差，自問只係正常身高170，望電視係要向下斜望而唔係直線水平。
除非為了想儲100%里數或者公幹唔駛自己俾錢唔志在，真係寧可坐番econ。380仲可以揀上層仲靜仲舒服。

淡咖啡 發表於 2019-6-1 22:10
也坐過SQ PEY HKG/SIN/ZRH，350+380，也是Recaro產品，同感唔值。尤其係380機艙空間感大，坐低咗似係小矮人 ...

更高艙等未有機會坐
但有時覺得啲人吹SQ吹大咗
變相同期望有一定落差