[2008.06/07] CX289/288 HKG-FRA

這個2008年的旅程在2011年已經發表鐵路遊記，現在追回發表陳年飛行報告。

旅程原委已在鐵路遊記提及，學術交流出公數，唔使自己畀錢亦唔係自己揀航班。說來有趣，我去過四次歐洲，有三次搭直航都唔使自己畀錢（1996年跟屋企人去旅行、2008年及2019年交流），只有其中一次係自己畀錢（2014年旅行：航空、鐵路），而自己畀錢要平同舒適就搭QR轉機。然而，若非2008年這次去德國的經驗，都未必有2014年的QR之旅。

行李護照都妥當放好

去程
日期：2008-06-01/02
航班：CX289
時間：23:50 HKG – 06:00(+1) FRA (05:22埋閘)，表定航程約為12h10m
用機：B747-400 (編號不明)

CX289在61號閘登機


沙田精神號


是次航班用機，角度問題影唔到編號，殘念。


全程都在黑夜中，無拍到任何機外景色。香港時間翌日00:52食晚餐，留在德國1.5個月都未必有好飯食，就揀食飯吧，睇個樣應該係魚。


香港時間6月2日09:19／德國時間凌晨03:19食早餐，我食西式，腸仔同奄列都唔錯。


同行師兄食中式，好似係雞肉加腸粉。


德國時間05:22降落法蘭克福機場


大約40分鐘完成入境及取行李，呢度有張地圖，不過我地唔係自己搭車。


在集合點「E」等候



教授幫我地安排專車接送，係一部「van仔以上小巴未滿」的小客車，司機等埋其他要接送的乘客再一齊出發，首次體驗autobahn，左線間中有超跑掠過。開往海德堡大學途中，在市郊突然駛入一處田野，原來有位學生炒單車受傷，司機載埋呢位同學返大學。


去到大學時只係08:00左右，加上係星期一，大部分教員學生都未返到。我地人生路不熟，連住邊都唔知，所以也無法先行辦理入住。好彩當地教授已交帶清潔工帶我地上實驗室等候，發現升降機係要自己開閂外門的古董。據當地博士所言，實驗室大樓係1960年代落成，但無論樓面裝修定機械設備都保養得幾好。


實驗室外望，點解個環境可以咁靚！中大已經算唔錯，但去到外國，完全係另一回事。



我地三人在guest house住一個單位，我同一位師兄瞓呢間房，另一位瞓廳，都有張床。雖然無冷氣，但夜涼如水，仲夏夜氣溫都只係十幾度，實驗室意大利同學話佢經歷過最凍的冬天係初來海德堡的夏天。


有個露台，有時晚飯後我會在此品味人生。


由我房望向其他單位，我地係角落房零舍大間。

沒有變的古城

以下分享一些海德堡景色。

由住處行冇幾遠就見到呢條攔河堰，上有行人道，名為Wehrsteg Wieblingen。


橋面以木板鋪成



望向上游


望向下游


可見此堰令Neckar河水流在海德堡市區較為平靜


我6月頭到，教授在7月頭亦過來度假，某日一齊行山，先上哲學家之路Philosophenweg，遠眺海德堡城堡及市區。


海德堡城堡


聖靈堂Heiliggeistkirche


舊城區與建於1788年的舊橋Alte Brücke Heidelberg


海德堡市東、Neckar河上游另一道攔河堰，與先前下游攔河堰一樣，堰旁設水閘供船隻適應水位變化。


水閘



攔河堰



遊河船


聖靈堂背後


登上海德堡城堡




望返落城下町


北岸住宅


城堡博物館內有一個巨型釀酒涌


行山路上王座山Königstuhl山頂


景色絕對值得，但6年後再訪時就搭巴士算了。圖中斜坡左方樹後係登山纜車，但我兩次去海德堡都無搭過。


海德堡曾經有個軍用機場。根據資料，美國空軍於2002年撤出該機場，之後有一段時間供直升機及消防部門使用，至2014年交還德國政府，於2019年決定改建成農業公園。


圖中最遠的一條橋就係Wehrsteg Wieblingen

離開是為了回來

回程
日期：2008-07-12/13
航班：CX288
時間：13:55 FRA – 06:50(+1) HKG (07:10落機)，表定航程約為10h55m
用機：B747-400 B-HUG，1993-12-10以編號VR-HUG加入國泰，1997-08-11改為B-HUG，至2015-03-04飛往美國佛羅里達州奧蘭多Sanford International Airport (SFB)封存，相信已被拆毀。

臨走前回望宿舍最後一眼，那是我人生中除屋企外留宿得最耐的地方。



同樣的接送車，呢張係開車後去另一個接送點時攝。


到達法蘭克福機場


FRA的無人駕駛，呢次同2014年都冇搭過。


客運大樓內


有齊航空公司櫃枱、旅行社、巴士鐵路資料、航班時刻表的佈告板


去E區check-in。住咁多日，買落唔少手信，行李好重，過磅時竟重達37kg。行李限額好似係23kg，地勤見我非常狼狽，就話唔使我補錢，只要執到32kg，即搬運工可接受的上限。於是我在兩名師兄協助下執出5kg物品，到香港再分返。


航班顯示屏


登機閘也在E區



上樓上搞退稅，向下望返出發大堂。當時機場大樓在改建中，搵路都花了不少時間。


去到閘口見到機尾，遠處有兩部Bae 146/Avro RJ。


伊朗航空A300與Air Berlin A320


上機


耳機插頭


飲品架


電源插座及枱面


德國時間16:13派晚餐，好似係雞肉薯蓉。


鄰座好似係牛肉飯


太陽沉下


香港時間06:18食早餐，應該係德國款，個蛋幾得意。


返到香港，呢次就係我目前為止最後一次搭747飛長途。


感想
現在回看，當年餐膳都唔差，我在飛機基本上乜都食，印象最差係2014年搭第一程CX去多哈時個一頭乾包真係啃唔落，其他時候都尚算唔錯。

不過國泰FA（當年）的服務質素始終有改善空間。去程開始天光時，我去完廁所發現同行師兄（內地生）與空少（心口塊牌只懂粵語）在雞同鴨講，原來師兄想食早前派過的蛋糕，但空少完全聽唔明，斟了一杯紅茶。我了解後問空少有冇蛋糕，佢話冇晒，只有麵包，師兄唔想食，就此作罷。我記得去廁所時就係見到該名空少出來，睡眼惺忪，頭髮都未執好。空少年紀睇落同我差唔多，唔知佢而家點？我唔強求一定要識普通話，但執生技巧呢，溝通唔到點解唔搵人幫手？假如乘客係報告緊急情況咁點算？

回程時與一名德國阿叔同座，阿叔只識德文及少少英文，但我地都溝通到，佢話到香港轉機去菲律賓見老婆，背後故事我就唔理啦。航程期間佢想飲啤酒，撳到個識英文的香港空姐，佢用德文講bier及做出飲酒動作，空姐唔識聽，我話佢想飲啤酒，空姐先識得同佢覆述係咪要beerrrrrrr……我唔識德文都一聽就知德國航班有個德國佬講bier係乜意思啦……雖然口音各有不同，但bier同英國口音beer差唔多，咁都聽唔明。我唔係特登想雞蛋裡挑骨頭，冇事發生就唔會有野寫。

返港之後，幾經辛苦趕及準時畢業，雖然我好感激教授畀機會我去德國交流，然而壓力實在難頂，加上自覺比唔上大陸同學，所以無再攻博士而係去搵工。初時都想做返與學科有關的工作，曾在大學做教學助理，之後因緣際會做了一份與學歷無關的工作，轉眼已踏入第十年，讀書時一直冇諗過在呢方面發展，人生就係咁奇妙。

這次旅程令我大開眼界，我同自己講，有朝一日一定要以遊客身分再次深度體驗德國，到2014年終於成事，搭了ICE、CNL，去到漢堡、柏林，原本只係順路探探的Friedrichshafen、Stuttgart更是回味無窮，並在第二故鄉海德堡住足三晚。

本文完，多謝點閱。

多謝分享

2008 年 6 月亦係我首次衝出亞洲，當時參加一個 summer program，坐 KE HKG-ICN-NRT-LAX（唔係早前分享過 2010 年正式出外留學果次），可惜無相片紀錄

第一次去德國係 2015 年去見工，猶記得當時來回坐 LH，第一次坐 747-8i 兼第一次坐 A346；整個旅程，無論係飛行體驗，到行程本身，都令人大開眼界。最後有 offer 但因為種種原因 decline 左，但我對呢個國家實在十分欣賞。此後除左 2016 年坐移民監之前、再加上其他私人原因，心血來潮走左去英國一個星期之外，2017、18、19 都趁飛去歐洲公幹期間，順便遊玩，三次都有去德國，全部唔使自己付鈔（正確來講係出差日數既 per diem 夠 cover 私人行程支出有突）

當中 2019 年去過 Heidelberg (link)（仲坐埋登山纜車）、Stuttgart (link) 同 Nuremberg (link)，好幸運疫前幾次出行，加埋幾乎去過晒德國大部分值得睇既城巿。而家雖然無咩實質限制，但始終麻煩唔少，而且下次有機會去歐洲出差，都唔知係幾時了

Heidelberg 幾乎肯定係德國景色最優美怡人的城巿

如果唔係當年有機會出國讀書，我想像唔到我今日會係一個點樣既人。如果唔係因為當年機緣巧合，有得去德國見工，我諗我或者未必會有去歐洲玩既念頭，世界觀會同今日好唔同，可能會少左一份對其他國家同文化既欣賞。

S3BL100 發表於 2022-4-15 13:32
多謝分享

2008 年 6 月亦係我首次衝出亞洲，當時參加一個 summer program，坐 KE HKG-ICN-NRT-LAX（唔係早 ...

同行師兄問我覺得邊個地方最靚，我都認為海德堡無得輸。甚至2014年在紐倫堡電車上遇到三個青年，佢地問我覺得德國邊度最靚，我都依然係答海德堡，佢地話海德堡只係大學城，點解唔答紐倫堡。　咁我真係覺得海德堡景色及氛圍最正，有山有水有古城，諗落奧地利Salzburg都有點相似。

2008年呢次對我而言都係life-changing experience，但好諷刺地，我獲教授安排訪德，卻因而催生離開的念頭。

DIH 發表於 2022-4-15 12:35
離開是為了回來

回程

如果冇錯，你去程架機應該係 B-HUI

AVD1 發表於 2022-4-15 16:35
如果冇錯，你去程架機應該係 B-HUI

勁！咁都搵到。介唔介意分享下係邊到搵到?

DIH 發表於 2022-4-15 14:54
同行師兄問我覺得邊個地方最靚，我都認為海德堡無得輸。甚至2014年在紐倫堡電車上遇到三個青年，佢地問我 ...

奧地利 Salzburg 2017 年去過，係另一種美，但始終同 Heidelberg 唔同

德國計，2015 年去過的 Dresden 同樣係有山有水有古城，亦相當唔錯；但呢個城巿二戰期間幾乎被夷為平地，唔少歷史建築都係後來按原本設計同風格重建的

咁我當然喺呢個課題上面係有好強烈個人 bias ()，但 PhD 亦唔係個個人適合讀，就算讀得掂亦唔代表適合做學術研究。不過西方社會唔似香港咁狹窄，唔少 PhD 讀完之後都唔會做返學術，而 STEM PhD 只要有門路，工業界亦有唔少工作機會，可以一展所長同時搵真銀。講到尾，由跟著邊個教授、壓力大唔大，到出來之後搵著咩工，個人際遇影響舉足輕重；但我亦傾向相信，路係人行出來的，總有辦法減少自己失敗機會。而最適合自己既道路、安身立命之所，亦因人而異，總能尋獲。

順帶一提，我至今為止最後一次坐 747-400 亦係同 FRA 有關，不過唔係 CX，而係 LH，2018 年 10 月 FRA-DEN。至今仍有少少後悔 2019 年去歐洲果次，回程經 MUC 轉機坐 A359 而唔係經 FRA 再坐多次 744。而家估唔到 LH 部分 744 竟然可以復出，令 LH 成為全球最後一間有 744 運作既主要航空公司；但日後會唔會有機會再坐，亦未可知

TE8311_QTR 發表於 2022-4-15 22:41
勁！咁都搵到。介唔介意分享下係邊到搵到?

http://www.acarsd.org
佢地由 2006 年開始做 record，做到 2018 年左右就冇再 update 。

http://www.acarsd.org/world_ACARS_reports.html

AVD1 發表於 2022-4-16 06:00
http://www.acarsd.org
佢地由 2006 年開始做 record，做到 2018 年左右就冇再 update  。

哇，呢個網少啲運氣都唔掂喎
個security差到google唔俾入，跟住用safari強行入咗之後就搵啦，我想搵嘅日子全部都無record到
樓主好好彩