今晚帶左兩位遊客搭機場巴

在圓方見一位外國男遊客用電話屏幕問路，行前睇，係問機場巴士。我知站位係佐敦道柯士甸站，又得閒，就話帶佢去個站位。點知原來佢係聾啞人，只可用電話屏幕溝通，咁我就禁電話話佢知我帶你去巴士站啦，不過又發覺佢只識俄文，好在大家都識用google翻譯，咁我所有同佢溝通都係禁英文再轉俄文比佢睇。佢話等埋去緊廁所嘅女朋友……原來佢地兩位都係聾啞人仕，佢地之間都係手語交流，又無人聽到我講嘢。

去巴士站嘅途中我就問佢地有無八達通或信用卡或現金來比車費，佢地話只有現金。我話每人$40.8，兩位係$81.6，佢地拿出手頭現金睇，有幾舊水，夠比車費嘅，但係散銀得40幾，我就話咁就需要掟張100蚊入去，巴士無找贖嘅，佢地表情有少少失望咁。

去到巴士站，佢地兩位交流左一陣，再抄翻佢地行李，竟然揾到多張廿蚊紙，再數埋D硬幣，終於夠比82蚊……

去到巴士站前已睇過ETA，A25係1分鐘A22係10分鐘，我諗特登skip A25好D，費事先停大橋令佢地有疑問。佢地揾齊散銀之後A22到左，我就同師傅交待呢兩位客係聾啞人，聽唔到嘅，假如去到尾站（GTC）佢地仲未落車，就麻煩禁電話話佢知已到機場。師傅循慣例同我確認佢地去邊，我話係機場。

報告完畢。

小弟覺得，預先問清楚佢地支付方式同提佢地預備散銀，係啱嘅。假設不聞不問，咁個波會去到車長度，極不理想，何況車長根本無條件即場拎電話出來禁想講嘅說話。

想必呢兩位遊客在香港期間，接收各種資訊都係影低英文再翻譯為俄文來睇嘅，都幾辛苦。希望佢地在香港有個開心旅程啦。

搭E23/A都得，咁四十幾就夠比有餘，反正總站係GTC，唔係航天城

原來呢啲嘢係巴士討論 而唔係巴士迷交流？

lsc04d11 發表於 2025-2-25 07:41
原來呢啲嘢係巴士討論 而唔係巴士迷交流？

多謝提點。
麻煩admin移去B22，多謝。