星宇航空 A330neo台北(桃園)>東京(成田) 商務艙體驗

星宇航空 A330neo台北(桃園)>東京(成田) 商務艙體驗


日期：26MAY2024
時間：10:40(11:11)-15:00(15:02)
航班：JX802
機型：Airbus A330-900 B-58304

因為長榮集團張氏一家內部鬥爭，張國煒被迫離開長榮航空，重整旗鼓之後創立全新品牌"星宇航空"並以以精航空為目標，早在開辦初期已經想坐，何奈因為疫情封關被迫取消，直到今年終於有機會坐一次短途商務艙。經歷過精品睡袋連環爆鑊事件之後，星宇究竟係理想中嘅精品航空定係網紅航空？

首先嚟到桃園機場第一航廈捷運站，星宇主要係用第一航廈，飛美國嘅先係第二航廈，記得睇清楚唔好落錯車。


機場指示乘客去第6行但嗰度係經濟艙櫃檯，其他係喺第5行。今次只帶一個登機箱+背囊，因為後續行程緊迫所以問准咗地勤check過無超重，貼上已檢查標籤就可以登機。
商務艙嘅乘客會收到兩張票，一張係機票而另一張係貴賓室邀請卡。

第一定第二航廈都有星宇自營貴賓室，由於地勤無打算同我講第二航廈嗰個都可以去就無謂行咁多冤枉路啦，直接去第一航廈呢個。

職員會安排乘客入座，我坐得少飛機咁樣安排係第一次見。緊係啦，第一航廈呢個座位少空間離奇地細，無可能不停放人入去。

一坐低職員會送上餐牌畀你點餐。


自助吧選擇僅比環亞貴賓室多少少，相信第一次嚟都會失望。

餐點未到先試自助吧熱食。炒土雞蛋淡而無味，剝皮辣椒肉包就好好食，只係可能保溫太耐個皮硬咗啲。

今次叫咗柚子雞湯拉麵，湯底清而不油膩，糖心蛋都係有水準嘅，比起國泰鹼水擔擔麵係做得更好。

見人哋食得咁開心我又攞返個布甸食，布甸有雲尼拿香好滑，黑糖唔會太苦。

今日閘口安排喺A5，桃園機場想影飛機我勸你都係放棄好啲。

其實我打從一開始就已經訂錯，只係洗濕左嗰頭安慰自己未坐過A339所以無所謂，A339整體配置係
區域性航機設計，所以唔係A350嘅1-2-1反魚骨設計，而係近似老東家長榮787咁用1-2-1交錯佈局，座位可以完全躺平，呢點係國泰畀唔到各位。

左邊有遙控器，單色OLED屏幕會顯示航程資料，但可以放心係唔會用得着。

充電器有齊USB A同USB C再加火牛插座，夠用有突。

無線充電直頭係廢嘅，當唔存在就得。

IFE屏幕係4K解像度但無標明邊套係4K就差啲，內容亦唔算好多，可能老東家都好過佢。


耳機收埋喺入面。耳機望落去似Sony但又無標明，先當唔係。耳機係有線，A350就係Sony WH-1000XM5無線降噪耳機，咁大家自然明白旗艦機同區域性航機係點樣刻意作出分別未？下次識揀啦。

精品航空公司喺整理客艙時都可以咁唔小心，我無嘢講。

坐底無幾耐就有人送上迎賓飲品同熱毛巾，飲品係冷壓果汁無得揀，熱毛巾十分夠熱。

星宇作為新進公司，安全須知影片用動畫形式制作好過國泰N倍，太耐無坐過中華航空無印象有冇換新，老東家長榮亦喺星宇公佈呢個動畫之後換新嘅安全須知影片






菜單及酒menu，區域性航線嚟講酒水唔會畀得好小氣，餐點亦係唔怕你餓只怕你食唔曬。


除咗機上menu，你亦也以喺出發前21日起至48小時前預訂特別餐或者係"星饗宴，呢個服務其實唔係星宇首創，我選擇咗胡同燒肉出品嘅漢堡排。


起飛前空中服務員會幫乘客點餐，亦會主動推介餐飲，分別會有餐前、跟餐/甜品，再按需要可以請佢哋畀多杯特飲你，呢啲服務唔係最特別，而係同佢哋交流時會感到愉快同好落力服務乘客。

餐檯唔係好大，按屏幕旁邊TABLE掣就開到檯，空姐會喺派餐前鋪好枱布。

呢個係網上預訂限定餐，胡同和牛漢堡排，望落去份量適中但實際我有八分飽，全部都係好食嘅，飯係炊飯而唔係白飯，咁就比JAL有心思啲。

甜品係水果拼盤加布甸，布甸蛋香重口感滑，附送一片朱古力；珍珠奶茶都係出名好飲，唔會有種飲糖水嘅感覺。


飯後請佢哋畀多Mojito畀我，飲埋飽到上心口，準備要瞓一陣。

話就話呢個位行距感覺有啲窄，但對我嚟講係夠用。

所謂精品航空公司，歌手簡介連日本LiSA同韓國Lisa都未分清楚以為係同一個人，可能係我時運高咁啱睇到。

睇埋廁所，足夠乾淨同帶有香氛香味，呢啲細節係會加分。

總結：仍需精益求精

期待4年之久，聞名不如見面，單論論軟件已經可以同老東家長榮睇齊甚至青出於藍勝於藍，硬件質素受制於桃園機場第一航廈限制注定係難以同其他航空公司拉開差距，寄望桃園機場第三航廈落成大洗牌會為星宇帶來更多機遇精益求精。

好快會有另外兩篇飛行報告，玩埋今年出年就無咁爽啦。

同其他航空公司一樣，商務艙嘅乘客會收到兩張票，一張係機票而另一張係貴賓室邀請卡。

這個不一定，早排我坐 KE 就只有一張上面印住 Lounge Service 的 boarding pass 代替貴賓室邀請卡。

BTW 手機 APP cap 圖未遮名

雖然 A350 hard product 可能比起 A330neo 更出眾，但全世界計，要坐到 A330neo 機會點都比 A350 少好多

但佢地 soft product 睇落真係非常吸引

S3BL100 發表於 2024-5-28 22:35
雖然 A350 hard product 可能比起 A330neo 更出眾，但全世界計，要坐到 A330neo 機會點都比 A350 少好多

...

當我訂完JX802之後發現用A330neo之後我的確係咁安慰自己，而且係睇得出佢哋係有用心

執客倉嗰度可能人唔多夠所以無咁細心
JX餐飲同空服service基本上已經打穩咗
但IFE仍需努力🤭同埋排點盡量唔好似足LCC咁緊

反而個廁所好似比較少人講
但真係唔多航空公司會裝飾個廁所
基本上都係好有壓逼感嘅default白色主色設計
驚死你比平時去耐咗廁所咁 (當然事實上飛機廁所又真係無咁安全，尤其近排比較多unexpected亂流唔少傷)

Ricky403 發表於 2024-5-29 14:05
執客倉嗰度可能人唔多夠所以無咁細心
JX餐飲同空服service基本上已經打穩咗
但IFE仍需努力🤭同埋排點盡量唔 ...

唔好話裝飾，星宇係連氣味都有留意到特登調配隻專用香味，呢啲細節位加好多分

我有一樣野好奇就係330neo J有冇 0G 功能 舊年我坐完一次350J見到呢堆功能真心覺得正

Greensleeves 發表於 2024-6-1 22:25
我有一樣野好奇就係330neo J有冇 0G 功能 舊年我坐完一次350J見到呢堆功能真心覺得正 ...

冇，暫時呢個功能只係350獨家